O profesorado da especialidade de FOL asume funcións do ámbito da orientación profesional. Algúns dos contidos dos módulos e das áreas da súa competencia docente, xunto coas funcións que a normativa lle atribúe, como membro do departamento de orientación dos IES e dos departametos de orientación e información dos centros integrados de formación profesional, remarcan a necesaria especialización do profesorado de FOL no campo da orientación profesional.
Por outra parte, a heteroxoneidade na formación inicial do alumnado que cursa a especialidade de FOL que, fóra dalgunha excepción, non ten cursado materias relacionadas coa OP, unida á necesidade de formación específica neste campo xustifican a incorporación da materia de Orientación e Inserción Laboral no itinerario de Formación e Orientación Laboral. A materia de Orientación e inserción laboral quere significarse nas dimensións profesionalizadora e orientadora. Como profesionalizadora, a finalidade pretendida é a adquisición das competencias que lle permitan comprender o alcance da orientación profesional e o exercicio satisfactorio das funcións orientadoras propias da especialidade. A dimensión orientadora asume o coñecemento dos cometidos de orientación profesional propios do profesorado da especialdiade de FOL. |