1. Observacións xerais

Todas as actividades ou probas deberán cumprir unhas exixencias mínimas de corrección lingüística (ortografía, puntuación, concordancia sintáctica, ausencia de reiteracións, precisión léxica, rexistro formal…); no caso de deficiencias lingüístico-expresivas, estas poderán ser penalizadas na cualificación segundo o documento "Exixencias mínimas de corrección lingüística" (aprobado pola Sección de Galego-Portugués o 6/7/2018 e pendurado en Moodle).

O alumnado terá de entregar os traballos e actividades no prazo fixado. A entrega de actividades fóra de prazo será penalizado na cualificación.

Os traballos presentados polo alumnado poderán ser incorporados á ferramenta para a detección de plaxio Turnitin. Calquera falta de honradez académica (plaxio, é dicir, utilización de textos ou ideas de outros autores sen indicar a procedencia, copiar traballos, copiar en exames, ou outras formas) penalizarase de acordo co establecido na normativa académica

2. Requisitos para superar a materia

Para superar a materia, o alumnado deberá conseguir globalmente unha cualificación igual ou superior a 5 valores sobre 10. Na proba mixta deberá obter como mínimo 4 valores sobre 10 para poder sumar os restantes elementos de avaliación.

3. Oportunidade de xullo

Na segunda oportunidade, en xullo, o alumnado será avaliado cos mesmos criterios que na ocasión anterior, só que o "Traballo tutelado" pasará a ser puntuado con 3 valores, absorvendo así o "Obradoiro".

O "Traballo tutelado" será entregue na data oficial do exame. No caso da "Presentación oral", marcarase un día para a súa realización.

4. Convocatoria adiantada de decembro

Consistirá na realización dunha proba escrita (60% da cualificación) e na entrega, o día da proba, dun traballo tutelado previamente fixado polo profesor (40%).

5. Non presentado/a

Será considerado NON PRESENTADO/A o/a estudante quen non se presente á proba mixta.

6. Dispensa académica e matrícula parcial

As persoas que teñan dispensa académica terán condicións especiais de avaliación:

- Proba mixta (50%).
- Lecturas (10%)
- Traballo tutelado (30%).
- Presentación oral (10%).

Para concretar as características das actividades, o/a estudante deberá pórse en contacto co profesor antes do día 15 de febreiro.

7. Alumnado con incompatibilidade por razóns horarias ou laborais

O alumnado repetidor que non poida asistir ás aulas e o alumnado que tiver horario laboral incompatíbel co seguimento da materia mais que non cumpra as condicións para obter a dispensa académica deberá comunicalo ao profesor a través dun correo electrónico antes do 15 de febreiro. Após as pertinentes comprobacións, o profesor confirmará se as condicións de avaliación serán equivalentes aos casos da dispensa académica.

8. Apoio á diversidade

A materia poderá ser adaptada ao estudantado que precise da adopción de medidas encamiñadas ao apoio á diversidade (física, visual, auditiva, cognitiva, de aprendizaxe ou relacionada coa saúde mental). De ser o caso, deberán contactar cos servizos dispoñíbeis na UDC ou no centro nos prazos oficiais estipulados de maneira previa a cada cuadrimestre académico (https://www.udc.es/cufie/ADI/apoioalumnado ou coa titora ADI da Facultade de Filoloxía a través do correo electrónico pat.filoloxia@udc.gal).