Para superar a materia, o alumnado deberá aprobar por separado tanto a teoría como a práctica da materia. As prácticas non se recuperan en xullo; excepto naqueles casos nos que o estudante alcance o 40% da nota máxima de prácticas, permitíndoselle entón que realice todas as prácticas respecto dun novo caso práctico especificamente exposto para unha posible recuperación. De ser así, o novo caso práctico será subido á plataforma virtual dúas semanas antes do exame teórico da materia. Na avaliación dos traballos entregados polo alumnado valorarase o grao de consecución das competencias e, en particular, a posta en práctica dos contidos achegados pola materia ás devanditas competencias. Ademais, valoraranse as competencias transversais sempre que sexan requiridas para o desenvolvemento destes traballos.

As preguntas do exame teórico centraranse nos contidos específicos que se desenvolveron na materia en relación ás súas competencias e que poderán ser adquiridos tanto na parte expositiva como na interactiva. A duración media do exame é de aproximadamente 2 horas e poderá constar de preguntas tipo test, preguntas curtas e problemas de casos prácticos. No exame avaliarase o grao de asimilación dos obxectivos docentes establecidos no programa da materia.

Non se realizará ningún exame parcial.

Unha vez aprobadas ambas as partes por separado, cada parte contará un 50% na nota final.

Para ter unha avaliación de NON PRESENTADO debe de concorrer algunha das seguintes circunstancias:

1. Non asistir polo menos ao 85% das prácticas da materia.

2. Non realizar o exame teórico da materia a pesar de superar as prácticas da materia.

3. Non realizar o exame teórico da materia e comunicar explicitamente e por escrito ao responsable da materia que se abandona a materia cando, aínda tendo realizado polo menos o 80% das prácticas da materia, non se aprobaron as devanditas prácticas.

Peso da avaliación continua na oportunidade extraordinaria de recuperación (probas de Xullo):

1. Mantense a nota conseguida nas prácticas durante o curso e tamén o seu peso na nota final.

Os profesores facilitarán, na medida do posible e dentro dos horarios establecidos para a materia, a asistencia aos grupos de teoría e prácticas que mellor se axusten ás necesidades dos alumnos que teñen a matrícula a tempo parcial, para os que tamén aplica a forma de avaliación aquí establecida. Os alumnos con dispensa académica de exención de asistencia deberán asistir a todas as probas de avaliación.

Todos os aspectos relacionados con dispensa académica, dedicación ao estudo, permanencia, fraude académica e igualdade rexeranse de acordo coa normativa académica vixente da UDC.

A docencia impartirase en inglés. A docencia expositiva será impartida pola USC e retransmitida para todo o alumnado. Haberá un grupo de docencia interactiva específico e presencial en cada universidade (USC-UDC-UVigo).