| Descrición xeral |
Globalización económica e desenvolvemento social é unha materia optativa dentro da especialidade de Economía e Sociedade. Consta de 3 créditos ECTS, que se corresponden con 75 horas de traballo do alumnado, dos cales 15 horas son de actividades presenciais e as restantes 60 horas serán de actividades de traballo persoal.
Esta materia pretende ampliar os coñecementos dos estudantes relativos aos procesos de internalización das economías e os elementos relevantes para observar e diagnosticar a interdependencia existente entre os obxectivos económicos e sociais. Preténdese que o alumnado desenvolva destrezas para diferenciar os elementos relevantes nos procesos de globalización, identifique as súas consecuencias e valore as distintas opcións de política económica e social. Para iso, analizaranse casos concretos de estudo sobre os que o estudante deberá realizar avaliacións, diagnósticos e valoracións das distintas posibilidades de acción para afrontar os retos sociais desde unha perspectiva económica. |