OBSERVACIÓNS
XERAIS

1.1. Para superar a materia, o
alumnado deberá atinxir unha cualificación igual ou superior a 5 puntos sobre
10. Igualmente, na proba mixta terá que obter 5 puntos sobre 10 para poder
sumar os restantes elementos avaliábeis.

1.2. Tanto
as actividades como as probas deberán cumprir unhas exixencias mínimas de
corrección lingüística (ortografía, puntuación, concordancia sintáctica,
ausencia de reiteracións, precisión léxica, rexistro formal…); no caso de
deficiencias lingüístico-expresivas, estas poderán ser penalizadas na
cualificación, segundo o documento "Exixencias mínimas de corrección
lingüística" (aprobado pola Sección de Galego-Portugués o 6/7/2018 e
pendurado no campus virtual).

1.3. O TRABALLO
TUTELADO entregarase na aula, en papel, nos días fixados polo profesorado. Aplicarase
unha penalización do 25 % sobre a cualificación final desta actividade se for
entregada fóra de prazo sen causa xustificada.

1.4. Os / As
alumnos/as que non superaren a materia na 1.ª oportunidade (xaneiro) poderán
recuperala parcial ou totalmente na 2.ª oportunidade (xullo) segundo as normas
detalladas na epígrafe seguinte.

1.5. Os
traballos presentados polo alumnado poderán ser incorporados ao Turnitin,
ferramenta para a detección do plaxio (mesmo de traballos previamente
presentados nesta ou noutras universidades polo/a estudante).

1.6. En
calquera actividade avaliábel a falta de honradez académica implicará que o/a estudante sexa
cualificado/a con “suspenso” (nota numérica 0) na convocatoria correspondente
do curso académico, tanto se a comisión da falta se producir na
primeira oportunidade como na segunda. Para isto, modificarase a súa
cualificación na acta de primeira oportunidade, se for necesario.

1.7. A
materia poderá ser adaptada ao estudantado que precisar da adopción de medidas encamiñadas
ao apoio á diversidade consonte as indicacións da Unidade de Atención á Diversidade
(https://www.udc.es/cufie/ADI/), coa cal se deberá contactar nos prazos estabelecidos
por esta unidade. Pódese contar tamén co asesoramento da orientadora ADI da
facultade (pat.filoloxia@udc.gal).

1.8. Segundo se recolle nas distintas normativas de aplicación para a
docencia universitaria, deberase incorporar a perspectiva de xénero nesta
materia (usarase linguaxe non sexista, utilizarase bibliografía de autores/as
de ambos os sexos, propiciarase a intervención na aula de alumnos de e de alumnas
etc.).

Traballarase para identificar e modificar preconceptos e actitudes
sexistas e influirase na contorna para os modificar e fomentar valores de
respecto e de igualdade.

Deberanse detectar situacións de discriminación por razón de xénero e
proporanse accións e medidas para as corrixir.

2. CUALIFICACIÓN
FINAL na 2.ª OPORTUNIDADE (xullo)

2.1. Os / As
estudantes que suspenderen a PROBA MIXTA ESCRITA deberán facer outra proba do
mesmo tipo que a da 1.ª oportunidade na data, hora e lugar estabelecidos no
calendario oficial de exames da Facultade para a 2.ª oportunidade. Esta proba
suporá igualmente o 50 % da cualificación final e será preciso obter 5 puntos
sobre 10 nela para aprobar a materia.

2.2. Os / As
estudantes que non atinxiren a puntuación mínima na PRESENTACIÓN ORAL (con 5
puntos sobre 10), que supón o 15 % da cualificación final, terán que defendela
de novo na 2.ª oportunidade. Esta proba oral realizarase a seguir á proba mixta
escrita da 2.ª oportunidade.

3.
CUALIFICACIÓN DE NON PRESENTADO/A

3.1. En cada
oportunidade de avaliación o / a alumno/a recibirá a cualificación de NON
PRESENTADO/A (NP) se non realizar a proba mixta escrita e, alén disto, se o
número de actividades avaliábeis entregadas for inferior ao 50 %.

4. ALUMNADO
A TEMPO PARCIAL E CON DISPENSA ACADÉMICA

4.1. O
alumnado matriculado a tempo parcial e con dispensa académica recoñecida deberá
pórse en contacto co profesorado da materia no inicio do curso e asistir ás
titorías obrigatorias para planificar, en cada situación concreta, os axustes
necesarios na avaliación no tocante ás actividades presenciais (que serán
substituídas por outras non presenciais equivalentes).

5.
CONVOCATORIA DE DECEMBRO

O alumnado
que se presente á convocatoria de decembro será avaliado da seguinte maneira:
proba mixta (50 %), presentación oral (15 %) e traballo tutelado (35 %).