Descrición xeral |
A Socioloxía Económica é o estudo sistemático das relacións sociais de intercambio que os individuos establecen entre si, e das institucións económicas que se derivan destas relacións, e que ao mesmo tempo as condicionan. Partindo desta definición operativa, o curso céntrase no estudo da natureza das relacións sociais de carácter económico, así como das institucións relacionadas coa produción, distribución e consumo de bens e servizos escasos, en concreto mercados e diñeiro.
Na segunda parte do curso preséntanse os fundamentos da socioloxía das organizacións. Centrarémonos nos principais enfoques aplicados para comprender os modelos organizativos das empresas, que constitúen os principais axentes da actividade económica.
O curso presenta un alto contido metodolóxico e práctico. |