| Descrición xeral |
O principal obxectivo do Obradoiro de Planificación, Deseño e Xestión de Produto de Moda é proporcionar ao estudantado unha visión estratéxica sobre cómo se desenvolve o traballo de xestión de produto nunha empresa minorista de moda, tendo en conta o modelo e as cifras de negocio, os valores, o nivel de sostibilidade e o posicionamento da marca.
A través de casos reais, simulacións e proxectos prácticos, traballaranse de primeira man os procesos e as principais ferramentas analíticas e de xestión empregadas nos departamentos de produto das empresas de moda, para desenvolver as diferentes estratexias, coordinar o rol do deseño, planificar a compra e levar a cabo a avaliación dos resultados en ambientes omnicanais, a través da combinación de aspectos cualitativos e cuantitativos coma os indicadores de rendemento.
DOCENTE: VIOLETA BOUZADA traballou en diferentes multinacionais do sector téxtil como compradora e xestora de produto. Comezou a súa carreira no téxtil despois de licenciarse no Executive Master in Fashion Business Management na ISEM Fashion Business School, traballando nos departamentos de venda polo miúdo e xestión de produtos de marcas como Hoss Intropia en Madrid, C&A International en Düsseldorf ou Tally Weijl en París. Ao longo da súa carreira participou no desenvolvemento de coleccións para diferentes modelos de negocio, desde a "moda rápida" ata a premium. Actualmente promocionando o OUI JANE! (ouijane.com), un proxecto de moda e xoias sostible no campo do emprendemento social.
|
