AVISO IMPORTANTE:

Para o alumnado que realice avaliación continua, a cualificación final será o resultado da suma das cualificacións obtidas en cada unha das metodoloxías (proba obxectiva, obradoiro e sesión maxistral). Se esta suma non alcanza o cinco (5), o alumno estará suspenso na primeira oportunidade e terá que presentarse a unha PROBA OBXECTIVA FINAL na segunda oportunidade que constará dunha parte teórica e unha práctica (ver máis abaixo características desta proba).

ACLARACIÓN IMPORTANTE PARA PODER TER ACCESO Á AVALIACIÓN CONTINUA:
Para poder ter acceso á avaliación continua é requisito indispensable a asistencia ás clases da disciplina, actuando con interruptor para a avaliación a ausencia a máis de tres clases sen xustificación.
Para o control de asistencia utilizaranse os medios ó alcance do profesorado e do alumnado. No caso de non consegui-lo acceso á avaliación continua, o alumno pasará
é realizar a avaliación da disciplina mediante unha PROBA OBXECTIVA FINAL, cun peso de 100% da cualificación, coas características sinaladas para esta proba que se detallan máis abaixo.

ALUMNADO CON DISPENSA DE DOCENCIA: o alumnado que teña a dispensa de docencia concedida deberá elixir unha das dúas opcións expostas a seguir:

1ª OPCIÓN: Poderá realizar o seguimento da disciplina como se de avaliación continua se tratase, pero adaptando a porcentaxe do peso de cualificación de cada metodoloxía e o prazo de entrega. Para poder acollerse a este tipo de avaliación, e adaptar os operiodos de entrega e a avaliación das distintas probas/metodoloxías, é imprescindible poñerse en contacto coa profesora. A comunicación farase de maneira presencial ou vía mail a maria.romani@udc.es e se non reciben resposta da profesora no prazo de tres días hábiles, deberanse comunicar coa administración do centro para que se poña en contacto coa docente. Esta comunicación deberase realizar dentro dos 10 primeiros días hábiles de inicio do curso ou, en caso de solicitar a dispensa ao longo do curso, o día en que realice o trámite. De non cumprir este requisito, o alumno terá que realizar unha PROBA OBXECTIVA FINAL, coas características que se detallan para ela. 

2ª OPCIÓN: Realizar unha PROBA OBXECTIVA FINAL por valor do 100% da cualificación, tendo que acadar o 5 para obter o aprobado. En caso de non comunicarse coa docente tal e como se establece no punto anterior, considerarase que o alumno opta pola 2ª opción, é dicir, pola realización dunha PROBA OBXECTIVA FINAL, coas características que se detallan para ela.

SEGUNDA OPORTUNIDADE:

Aquel alumnado que non alcanzase o cinco (5) ou que figure como "non presentado" na primeira oportunidade, terá que realizar unha PROBA OBXECTIVA FINAL na segunda oportunidade, coas características que se detallan para ela.

CARACTERÍSTICAS DA PROBA OBXECTIVA FINAL:

1.             Constará dunha parte teórica e outra práctica.

2.             A realización da parte teórica realizarase na data e hora sinaladas no calendario oficial de exames. O seu peso será do 50% da cualificación (5 puntos).

3.             A realización da parte práctica realizarase na data sinalada no calendario oficial, pero de maneira individual, polo que será imprescindible concerta-la hora coa profesora (enviando un mail a maria.romani@udc.es) para realizala nun horario que faga factible a realización individual desta parte a tódolos alumnos. A profesora exporá unha listaxe en Moodle coa orde de realización e a hora aproximada. O seu peso será do 50% da cualificación (5 puntos).

4.             A cualificación final será a suma da parte teórica e da parte práctica e o alumno terá que alcanzar o cinco (5) para superar a disciplina.

CASOS ESPECÍFICOS:

As adaptacións curriculares para estudiantes con discapacidade ou con necesidades educativas específicas serán pautadas pola comisión de docencia do centro, logo de informe do PAT.