Para superar a materia o alumnado debe ser capaz de expresarse con corrección e fluidez de forma oral e/ou escrita en todas as probas de avaliación e nas diferentes tarefas e traballos obrigatorios, de forma que demostre unha competencia comunicativa axeitada para o seu desenvolvemento profesional. O dominio destas destrezas é preceptivo para aprobar a materia.

Modalidades de avaliación

Estabelécense tres modalidades de avaliación:

1. Para as persoas que formen grupo (constituído por un mínimo de catro persoas) e asistan regularmente ás clases (80%): obradoiro e portafolio grupal, onde se reflictan todas as tarefas prácticas elaboradas durante as sesións, xunto co material didáctico creado (27%), traballo tutelado escrito e exposición oral cos resultados (25%), reflexión crítica e argumentada non obrigatoria das lecturas obrigatorias que complementan os textos téoricos (8%) e proba de ensaio individual escrita (40%). O traballo colaborativo é fundamental nesta modalidade de avaliación, polo que se debe asistir a un mínimo do 80% das sesións interactivas; así pois, a docente fará un seguimento de asistencia. Para superar a materia é preciso ter aprobadas todas as probas (proba de ensaio, obradoiro/portafolio e traballo tutelado/presentación oral).

Na cualificación final da materia deste alumnado, tamén influirán variantes como a participación activa nas aulas, o interese mostrado polas actividades propostas, a valoración da resposta do alumnado e das achegas académicas, así como as actitudes profesionais demostradas no marco da docencia presencial. 

Os obradoiros inclúen ou poden incluír a asistencia obrigatoria a actividades que, aínda que se realicen fóra do horario específico da materia, poidan ser beneficiosas para o desenvolvemento dos contidos relativos a esta. 

2. Para as persoas con recoñecemento de dedicación parcial ou dispensa académica: proba de ensaio escrita extensa (70%), portafolio individual coas actividades propostas pola docente (10%) e un traballo titorizado e presentación oral (20%). Desde o inicio das aulas, este alumnado porase en contacto coa docente para establecer un plan de traballo e seguimento. Terán que realizar, individualmente, todas as actividades/traballos propostos ao longo do curso e entregalos nas datas establecidas pola docente. Se non se cumpre a entrega na data sinalada considerarase que dita/o estudante opta pola modalidade 3) de avaliación. A cualificación será a media ponderada das notas das actividades e traballos realizados durante o curso e da nota da proba escrita, debendo obter en cada unha das partes un aprobado para poder superar a materia. No caso de non superar algunha das partes na primeira oportunidade, deberán repetir na segunda oportunidade as partes non aprobadas (actividades/traballos e/ou proba).

3. Para as persoas que non formen grupo ou non asistan regularmente ás clases e convocatoria adiantada: unha proba de ensaio extensa (80% da cualificación) e un traballo titorizado (20%). Excepcionalmente, e a valoración da docente, o alumnado terá a posibilidade de ser avaliado na súa totalidade con base no exame (100%).