Tal e como establece o apartado 6.1.4 no artigo 6.º da Normativa pola que se regulan as ensinanzas oficias do Grao e Máster Universitario na UDC, aprobada polo Consello de Goberno o día 27 de xuño de 2012, “o TFM pode ser defendido e avaliado unha vez que se tivera constancia fidedigna de que a/o estudante superou todos os créditos da titulación excepto os do TFM”.

Previamente á realización do TFM, é preciso a presentación dun anteproxecto polos medios establecidos a tal fin polo centro para a valoración por parte da Comisión Xestora dos TFM. Dito anteproxecto, tras ser valorado, deberá ser aprobado con posterioridade pola mencionada comisión.

O traballo, consistente nun proxecto orixinal e realizado individualmente por cada estudante, deberá estar realizado no ámbito das competencias, coñecementos, tecnoloxías e ferramentas específicas da titulación. Así, este deberá estar orientado á aplicación das competencias xerais asociadas ao título cun carácter profesionalizante.

Este traballo será avaliado pola comisión designada polo centro na data, lugar e hora tal como figura no regulamento de Traballos de Find e Máster para o Máster Universitario en Enxeñaría en Informática da Facultade de Informática da Coruña.

No caso da/o estudante obter a cualificación de suspenso, o tribunal faralle chegar un informe coas recomendacións oportunas para a mellora do traballo e a súa posterior avaliación. Enviaráselle tamén unha copia deste informe á persoa ou persoas que dirixiron o TFM.

A revisión e/ou reclamación das cualificacións finais dos TFM levaranse a cabo de conformidade co previsto na normativa da UDC.

Plaxio: 

A realización fraudulenta das probas ou actividades de avaliación, unha vez comprobada, implicará directamente a cualificación de suspenso na convocatoria en que se cometa: o/a estudante será cualificado con “suspenso” (nota numérica 0) na convocatoria correspondente do curso académico, tanto se a comisión da falta se produce na primeira oportunidade como na segunda. Para isto, procederase a modificar a súa cualificación na acta de primeira oportunidade, se fose necesario.

Igualdade: 

 Segundo se recolle nas distintas normativas de aplicación para a docencia universitaria deberase incorporar a perspectiva de xénero nesta materia (usarase linguaxe non sexista, utilizarase bibliografía de autores/as de ambos sexos, propiciarase a intervención en clase de alumnos e alumnas...) 

Traballarase para identificar e modificar prexuízos e actitudes sexistas e influirase na contorna para modificalos e fomentar valores de respecto e igualdade. 

Deberanse detectar situacións de discriminación por razón de xénero e proporanse accións e medidas para corrixilas.