| Descrición xeral |
Nesta materia o alumno estudará o papel que o uso do paralelismo ten á hora de acelerar a execución de programas en xeral, e o procesamento de datos en particular. O coñecemento teórico partirá dos conceptos técnicos máis básicos de paralelismo, incluíndo a súa utilidade, aplicabilidade e o contexto técnico da execución de programas paralelos (Tema 1). Despois expoñeranse as principais tecnoloxías hardware que existen actualmente para o procesamento paralelo, así como as súas capacidades técnicas subxacentes relacionadas e necesarias para explotar o paralelismo (Tema 2). A continuación, profundizarase no paralelismo con conceptos engadidos, clasificacións, posibles deseños para a súa implementación software e maneiras de analizar o seu rendemento (Tema 3). Finalmente, aplicarase todo o coñecemento previamente adquirido estudando as ferramentas e tecnoloxías modernas para o procesamento de datos masivos, é dicir, poñendo o foco no Big Data (Tema 4). No aspecto práctico, o alumno realizará diversas sesións cun enfoque incremental a fin de adquirir o coñecemento e a habilidade de programar e/ou despregar solucións de procesamento en paralelo de datos. Empezarase con prácticas dirixidas a adquirir competencias máis técnicas e de 'baixo nivel', e irase progresando cara a solucións máis completas e de máis 'alto nivel'. Estas prácticas realizaranse de forma coordinada coa explicación teórica, de tal forma que se usarán técnicas e tecnoloxías previamente explicadas. De igual forma, as prácticas serán autocontidas e fortemente enfocadas á resolución de problemas ou escenarios concretos. Esta materia ten unha forte dependencia con materias previas como "Fundamentos de Programación I e II", principalmente polo seu requisito técnico para a programación, e "Deseño e Análise de Algoritmos" polo seu coñecemento teórico da análise de complexidade dos algoritmos. En menor medida requírense coñecementos previos da materia de "Fundamentos de Computadores" para comprender o comportamento empírico e o rendemento en xeral dalgúns programas cando estes execútanse nun computador. |
Asignaturas
