| Descrición xeral |
A especialidade dun campo científico sobre a ‘familia’ dentro do Grao de Socioloxía responde á necesidade de analizar as repercusións da dinámica familiar e os seus cambios en relación ás transformacións que ocorren no resto dos subsistemas sociais (as institucións económicas, educativas, políticas…). Aínda que os inicios desta disciplina vincúlanse a outros campos académicos como a historia e a demografía, o desenvolvemento da socioloxía en España durante os anos sesenta levou a un avance nesta área. A ‘familia’ comezou a formar parte dos estudos sociolóxicos ao entenderse que o cambio familiar non afecta unicamente á composición e estrutura dos fogares, senón tamén á cultura na que se insire. Recentemente, o envellecemento da poboación, as modificacións no tamaño das familias e a pluralidade que estas adquiren na súa constitución e funcionamento, expanden o ámbito tradicional destes estudos achegándose agora a posturas teóricas críticas desde unha perspectiva de xénero. Precisamente ese será o enfoque que predominará na docencia desta materia.
Por iso, comezaremos explicando no tema 1, “A evolución das familias en España”, os cambios básicos máis relevantes na estrutura da familia así como os elementos que incidiron no seu cambio. Despois desta aproximación ás formas familiares en España e a súa evolución histórica adentrámonos nun capítulo máis teórico, o tema 2, “A transformación da intimidade e da organización familiar desde un enfoque sociolóxico”, que permite identificar como se modificaron as estratexias e pautas na formación das familias entendendo que os novos comportamentos son produto dos procesos de modernización, privatización da vida familiar e aumento da autonomía individual. O tema 3, “Buscando o lugar das familias na teoría sociolóxica”, está enfocado ao ámbito de como a socioloxía analizou ás familias desde as opcións máis clásicas cara ás máis contemporáneas. O tema 4, “As achegas das teorías feministas para entender o cambio familiar, o traballo doméstico e o traballo reprodutivo”, incorpora os avances que as teorías feministas han realizado aos estudos sobre familia en España e cales foron as súas repercusións noutras disciplinas académicas. Destácase fundamentalmente o novo xiro das teorías feministas cara ao estudo dos traballos de coidados nos fogares e a repartición do traballo reprodutivo entre xéneros e xeracións. Profundando sobre estas cuestións, no tema 5, “A familia no centro do réxime de benestar”, analizamos o papel das familias como axencias de provisión en España ante a ausencia de políticas públicas adecuadas que cubran os riscos sociais da cidadanía. Este tema serve para analizar as relacións existentes entre as familias e os estados e como a fundación das políticas sociais realizouse baseándose na configuración familiar existente no país. |
Asignaturas
