Aqueles alumnos ou alumnas que
por causas excepcionais non poden asistir regularmente ás clases
presenciais interactivas ou ás non presenciais, é necesario que o xustifiquen
debidamente para poder ter dereito a unha avaliación axustada ás súas
necesidades, evitando agravios co resto do alumnado. Estas
circunstancias deben ser expostas convenientemente ao profesor ao inicio das clases, ou no momento en que se produzan, para
poder estudar a mellor opción en cada caso, en beneficio do alumno ou
alumna e o seu dereito á aprendizaxe en igualdade e equidade.

O alumnado regularmente asistente será
avaliado segundo a proporción que segue:

- Proba escrita convencional (Proba de ensaio) (60%). Que se desenvolverá sobre os contidos da materia na data sinalada oficialmente. En funcións das condicións sanitarias e das restriccións e recomendacións puntuais, poderá desenvolverse presencialmente ou a través de Teams. O alumnado disporá de toda a información necesaria, no seu momento, sobre este extremo. Esta proba consiste non desenvolvemento reflexivo, argumentado e aplicado, de 5 cuestións sobre os contidos da materia, previamente abordados nas sesións de clase e/ou nos diferentes traballos e tarefas encomendadas.

- Recensión bibliografica (15%). O alumnado realizará de xeito individual unha reseña bibliografica sobre un dos libros propostos ao comezo de curso, que deberá entregar, en tempo e forma, seguindo as indicacións do profesor para a súa elaboración.

- Traballos
colectivos (15%). Ao longo do cuatrimestre, o alumnado realizará unha serie de traballos en pequeno grupo, referidos aos diferentes bloques temáticos, seguindo a proposta e recomendacións do profesor.

- Aspectos actitudinais (10%). Considérase importante a atención do alumnado aos seguintes aspectos: regularidade na asistencia, puntualidade no comezo das sesións de clase,
interese pola proposta de contidos e a metodoloxía para abordalos; así
como tamén a súa participación en clase mediante unha actitude receptiva e crítica construtiva, e a colaboración nos traballos individuais e colectivos. 

TRABALLO INDIVIDUAL VOLUNTARIO DE INVESTIGACIÓN. Consiste nun traballo tutelado polo
profesor sobre a proposta temática que se realice ao comezo de curso,
relacionada cos contidos teóricos da materia, mediante o cal se pon en
práctica aspectos fundamentais das metodoloxías descritas e se promoven
as respectivas competencias. Constará dunha parte de revisión
bibliográfica e outra de traballo de campo aplicando diversas
metodoloxías de investigación, segundo o caso.  É importante reseñar que se trata dunha actividade voluntaria que require un seguimento continuado na súa elaboración durante todo o cuatrimestre. Por ese motivo, non se avaliarán traballos de cuxa elaboración o profesor non teña constancia.

Por outro lado, a evidencia de plaxio neste ou noutros traballos presentados será obxecto de sanción, acarreando directamente o suspenso da materia, axustándose a cualificación ao establecido no artigo 14. 4. Normas de avaliación, revisión e reclamación das cualificacións dos estudos de Grao e Mestrado universitario: "Na realización de traballos, o plaxio e a utilización de material non orixinal, incluído aquel obtido a través da Rede, sen indicación expresa da súa procedencia e, se é ou caso, ou permiso do seu autor/a, poderá ser considerada causa de cualificación de suspenso na actividade. Todo iso sen prexuízo das responsabilidades disciplinarias ás que puidese haber lugar tras o correspondente procedemento".

-Para poder ser avaliado, cada alumno ou alumna debe ter entregado a totalidade dos
traballos (individuais ou colectivos) encomendados, en tempo e forma. En
caso contrario, considérase NON PRESENTADO. Do mesmo xeito, recoméndase utilizar as horas de atención ao alumnado para
solventar dificultades relacionadas co desenvolvemento dos traballos
individuais ou colectivos, coa marcha da materia, aclarar dúbidas, etc.

-Enténdese que o alumnado universitario ten asumidas as competencias lingüísticas en relación á expresión oral e escrita. Por tanto, é primordial e obrigatorio a observación da normativa ortográfica (ortografía, acentuación e puntuación), gramatical e léxica nos traballos e exames realizados como condición imprescindible para superar a materia. No caso da lingua galega, pode solicitarse asesoramento no Servizo de Normalización Lingüística da UDC.

-Sobre a entrega dos traballos, recoméndase non imprimir borradores, o uso de medios telemáticos e, de non ser posible, as impresións a dobre cara en papel reciclado. Sobre este aspecto, o profesor dará oportunas indicacións se é do caso.

-O alumnado de modalidades
específicas de aprendizaxe e apoio á diversidade, ou que teña recoñecida dedicación ao estudo a tempo parcial ou calquera outra situación excepcional, deberá informar debidamente da súa casuística ao profesor, e coa debida acreditación. Debe facerse NO INICIO DO CURSO, a efectos de poder adaptar a súa situación individual ás esixencias curriculares da materia, poder cumprir os criterios de avaliación aos que se someta o resto do alumnado e garantir a necesaria igualdade de condicións no proceso de aprendizaxe e de oportunidades na avaliación da materia.  Excepcionalmente, no caso de que o /a
estudante, por razóns debidamente xustificadas, non puidera realizar
todas as probas de avaliación continua, o profesor adoptará as medidas
que considere oportunas para non prexudicar a súa cualificación.

-
No caso de estudantes con discapacidade, e dependendo da mesma,
o profesor arbitrará as probas oportunas contando co asesoramento da Unidade
Universitaria de Atencion á Diversidade (ADI).

- O alumnado de segunda oportunidade deberá realizar unha proba obxectiva que contará o 100% da cualificación, baseada nos contidos da materia.