Para superar a materia será necesario obter, como mínimo, unha puntuación de 5 (de 10) e asistir a clase coa debida regularidade. Para que as dúas actividades de avaliación (a presentación oral e o traballo tutelado) entren no cómputo final, será necesario obter polo menos un 4 en cada unha delas. Para máis información sobre estas actividades de avaliación principais, véxanse as follas explicativas publicadas no espazo da materia na plataforma Moodle.

Quen asiste a clase coa debida regularidade, pero non obtén a puntuación mínima nalgunha destas dúas actividades de avaliación, terá que presentarse a un exame final ben na primeira oportundiade ben na segunda ou posteriores para aprobar a materia. Neste caso, o exame valeralle o 100% da cualificación. De maneira excepcional, as profesoras poden considerar a posibilidade de que se presente, no momento de realizar o exame, un novo traballo escrito a título individual, pero dito traballo só servirá para subir a nota do exame entre o 0,5 e 1 punto. 

A presentación oral e os traballos tutelados suspensos non se poden recuperar porque son traballos elaborados a través da asistencia a clase e en grupo.

Quen non asiste a clase coa debida regularidade terá que presentarse a un exame final, que lle valerá o 100% da cualificación final. Excepcionalmente, as profesoras poderán permitir que a/o estudante en cuestión participe puntualmente nas outras actividades de avaliación. Nese caso, ponderarase o valor do exame final en función do grao e da calidade de participación nas demais actividades da materia, pero, por defecto, a participación nas outras actividades só servirá para subir a nota do exame entre o 0,5 e 1 punto.

A avaliación do alumnado con matrícula a tempo parcial e/ou con recoñecemento de dispensa académica será igual que a do resto do alumnado: dependerá do grao de asistencia a clase. 

O exame consistirá nunha proba mixta na que se especificará o peso de cada pregunta. Nas preguntas de resposta breve teranse en conta a pertinencia e precisión da resposta, a claridade conceptual, e a corrección gramatical. Nas preguntas de desenvolvemento teranse en conta a pertinencia e organización do contido, o dominio conceptual, a conexión entre ideas, a claridade expositiva, e a corrección gramatical. Para máis información sobre o exame, véxase a folla explicativa publicada no espazo da materia na plataforma Moodle.